Tandur hlaut á dögunum Svansvottun fyrir fjórar vörur í flokki snyrtivara. Þær vörur eru Hand- og Baðsápa – sem meðal annars er notuð í sundlaugum Reykjavíkur, SH-41 handsápa fyrir matvælaiðnað, Softex froðusápa og Handex handsápa.

„Við erum gríðarlega stolt af þessum áfanga. Að verða fyrst til að Svansvotta vörur í flokki snyrtivara er mikilvægt framfaraskref fyrir íslenska framleiðslu og staðfestir þann metnað sem við leggjum í að þróa umhverfisvænar og vandaðar vörur,“ segir Arnar Garðarsson framkvæmdarstjóri Tandur.

Það er sérstaklega mikilvægt að vanda valið á vörum sem eru í beinni snertingu við líkamann. Það berast sífellt fleiri tilkynningar um hættulegar vörur í umferð í Evrópu og þar eru snyrtivörur efst á lista. Efni sem finnast í þessum vörum geta meðal annars valdið hormónatruflunum, útbrotum eða, til langs tíma, illkynja sjúkdómum. Umhverfisvottun sem staðfestir öruggt efnainnihald er mikið heillaskref, sérstaklega á fjölförnum stöðum eins og sundlaugum þar sem fjölbreyttir hópar með ólíkar þarfir mætast.  

„Svansvottun er ekki bara umhverfisvottun heldur eru heilsusjónarmiðum gert jafn hátt undir höfði. Að fara í þessa vegferð er mikill gæðastimpill enda mikið traust sem fylgir vottuninni,“ segir Guðrún Lilja Kristinsdóttir, framkvæmdastjóri Svansins á Íslandi. 

Elínborg Erla Knútsdóttir, markaðs- og þjónustustjóri Tandur, ásamt fulltrúum Svansins við leyfisveitinguna.