Byggingarverktakinn ÁK Smíði hefur hlotið sitt fyrsta Svansleyfi fyrir fjölbýlishús staðsett í Hörgársveit. Um er að ræða fyrstu nýbyggingarnar sem hljóta Svansvottun í því sveitarfélagi og jafnframt fyrstu byggingarnar sem fara á almennan markað á norðurlandi.

Svanurinn tekur mið af öllum lífsferlinum og snúa kröfurnar í nýbyggingarviðmiðunum að því að sjá til þess að skaðleg efni í byggingaefnum séu takmörkuð, að sett sé upp rakavarnaráætlun, tekið sé mið af dagsbirtuhönnun og orkunotkun í hönnunarferlinu og margt fleira.

Þegar leyfishafar fara í gegnum sitt fyrsta verkefni er sett töluverð vinna í að aðlaga framkvæmdina í samræmi við kröfur Svansins og er það eitthvað sem getur verið lærdómsríkt að taka með sér inn í almenna verkferla sem unnið er eftir til að lágmarka umhverfisáhrif nýbygginga.

ÁK smíði hefur lagt upp með að hafa nýtni að leiðarljós og leggja metnað í að byggja hús þar sem fólki líður betur. „Svansvottun er ákveðinn gæðastimpill, sérstaklega fyrir kaupendur þar sem kröfur eru gerðar á innivist, rakavarnir ofl.“ segir Viðar Kristjánsson sem hélt utan um Svansvottunarferlið fyrir hönd ÁK Smíði

Hér má sjá frétt um leyfisveitinguna hjá Akureyri.net