Ræstiþjónustan Iclean fékk í gær afhent Svansleyfi. Iclean er fjölskyldufyrirtæki sem var stofnað árið 2015 og sótti fljótlega um vottun Svansins fyrir ræstingar. Í umsóknarferlinu tók ræstiþjónustan efnanotkun fyrirtækisins í gegn, bæði með tilliti til hlutfalls vottaðrar efnavöru og magns efnavöru sem fyrirtækið notar.

Til að hljóta vottun Svansins þarf efnanotkun ræstiþjónustunnar á hvern ræstaðan fermetra að vera undir vissum mörkum og þurfa að lágmarki 80% efnavöru að vera umhverfisvottuð auk þess sem efni eru bönnuð sem geta verið skaðleg umhverfinu og heilsu manna. Einnig eru kröfur gerðar á eldsneytisnotkun bifreiða miðað við hvern ræstaðan fermetra. Ennfremur er lögð rík áhersla á fræðslu og leiðbeiningar til starfsfólks og að fyrirtækið innleiði ferla svo tryggja megi gæði þjónustunnar.

Umhverfisstofnun óskar fyrirtækinu innilega til hamingju með áfangann og hlakkar til samstarfsins næstu ár.